حسیب قوای مرکز پانګوال، پانګې ویستلو ته مجبور کړي

خلک څنګه حکومت سره همکار شي؟

دولت دې خپل روزل شوي وتړي خلک دې نه داړي

ډیر کله یادونه کیږي چې په هیواد کې مو پانګونه نه کیږي، لدې ځایه سرمایه بیرون د مختلفو کارونو لپاره لیږل کیږي تر څو پرې د راتلونکي ښه ژوند لپاره د پلان مطابق مخته لاړ شي، پدې نه یواځې حکومت ټینګار کوي بلکې عام افغانان له خپلو شتمنو تجارانو او کاروباریانو غواړي چې پانګونه دلته وشي او خلکو ته د کار زمینې برابرولو کې ټول ګډه همکاري وکړي

خبره مې دې پورې را یاده کړه چې زمونږ دلته شته پانګوالو ته هر ورځ په یو نوم او بل نوم خلک دریږي او ترې په زور پیسې اخلي، دولت که د جواز او نورو دولتي پروسو په بشپړولو زرګونه ډالر رشوت اخلي حق یې دی یو څه خو کاروباریانو ته ورکوي خو زورواکي او بدماشان کاروباریانو ته څه ورکوي چې په مفته ترې زرګونه ډالر غواړي که یې ور نکړي کاروبار او ژوند یې ختموي

نن څومه ورځ ده چې د حسیب قوای مرکز له لاسه د قوای مرکز او شاداب ظفر سلګونو کاروباریانو او پانګوالو خپل کاروبارونه تړلي له هر یو یې زرګونه ډالر غوښتل کیږي کنه د ژوند ختمولو اخطارونه ورکوي، له کوچنیو کاروباریانو یې ۱۰ زره او له مناسب کاروبار لرونکو یې ۳۰ زرو ډالرو پورې غوښتي تر څو چې دولت د دغو خلکو مخنیوی نه وي کړی دغه کاروباریان خپلو کارونو ته نه راستنیږي او قلفونه به همداسې د دروازه په مخ لګیدلې وي

نو اوس تاسو ووایئ دلته به څوک څنګه پانګونې ته زړه ښه کړي؟ همدغه حسیب قوای مرکز تجارانو ته زنګونه وهي چې پیسې راوړئ کنه ژوند رانه نشئ کولای

د افغانستان د کورنیو چارو وزارت ویاند نصرت رحیمي په رسمي فیسوکپاڼه ویلي؛ د پنجشیر امنیه قوماندانی ته له وړاندې دنده ورکړل شوې وه چې حسیب قوای مرکز ونیسي او قانون ته یې وسپاري، له دې چې د پنجشیر امنیه قوماندان په دغه برخه کې تعلل کړی او جدي قانوني اجرائات یې نه دي کړي، هغه له دندې کوښه او پر ځای یې ددغه ولایت د امنیت آمر عبدالواسع فراجي د سرپرست په توگه وټاکل شو.

رحیمي زیاته کړې؛ له دې چې حسیب قوای مرکز په پنجشیر کې دی، نوي سرپرست امنیه قوماندان ته دنده ورکړل شوه چې ژر یې ونیسي او د قانون منگولو ته یې وسپاري.