د سپرلیو په موټرو کې د تګ پر مهال باید لاندې ټکو ته متوجه اوسو
لیکوال لطیف سروبیوال
زمونږ ټولنه نوې نوې د مدنیت په لور روانه ده په ډیرو برخو کې مونږ لا هم توجه ته اړتیا لرو چې باید توجه وکړو، ډیر کله به تاسو لیدلي وي چې لیني موټر ته داسې کسان راپورته شي چې ټولو سپرلیو ته اذیت ورسوي، تاسو که غواړئ څوک درڅخه اذیت ونکړي د چا زړه ازار نکړئ نو هر وخت چې سفر کوئ دغه څو مهمې خبرې ځان سره په نظر کې ونیسئ.
- موټر ته پورته کیدل او کښیناستل
لومړی خو چې کله موټر ته پورته کیږئ د موټر دروازه په احتیاط سره خلاصه کړئ او بندولو کې یې هم له پوره احتیاطه کار واخلئ، د ناستې ځای مو لومړی وګورئ چې تاسو پکې ځایږئ او که نه، که ځای مو مناسب نه و نو له ناستو کسانو غوښتنه وکړئ تر څو تاسو ته یو څه ځای پریږدي چې تر څو کینئ که چیرې له مخکې په سیټ کې ناست یئ او بل کوم کس موټر ته راپورته کیږي نو کوښښ وکړئ چې هغه ته مناسبه اندازه ځای پریږدئ داسې فکر وکړئ چې تاسو د شاتني سیټ دریمه برخه ځای اشغالولی شئ نور نو د نورو حق دی که په مخکې سیټ کې ناست یئ نو سیټ دومره مه شاته کوئ چې د شاته کسانو پښې پکې بندې شي
- بې اندازې خبرې کول (خپل منځي / ټیلیفون )
که په لیني موټر کې درسره کوم ملګری یا خپلوان مخ شي نو پرته له لومړنیو خبرو چې احوال اخیستنه ده نورې خبرې مه کوئ، ډیر خلک به تاسو لیدلي وي چې په ساعتونو ساعتونو سفر کې یې کېسې نه ختمیږي اکثره پکې بیا د نورو شخصي حدوداتو ته هم ور ننوځي، د ټیلفون راتلو په وخت کې اړینې خبرې وکړئ که چیرې کوم داسې څوک درته زنګ وهي چې تل تاسو سره اوږدې خبرې کوي کوښښ وکړئ هغو وپوهوئ چې اوس په موټر کې ناست یم او ښکته کیدو سره سم به تاسو سره په اړیکه کې شم، کله چې ټیلفون قطع کړئ له ناستو خلکو بښنه وغواړئ چې ستاسو ټیلفون ورته مزاهمت وکړ.
- ماتې پیسې ساتل
موټر ته د پورته کیدو په مهال باید تاسو ته معلومات وي چې زه ماتې پیسې لرم، مطلب چې د لس افغانیو لار وي تاسو باید ځان سره داسې بانک نوټونه ولرئ چې په اسانۍ سره یې ډریور ته ورکړئ او بې له کومې ستونزې مو سفر پای ته ورسوئ، ځینې وختونه داسې هم کیږي چې ټولې سپرلۍ ستا له وجې وځنډيږي ته دکان په دکان ګرځې خو څوک ماتې پیسې نه درکوي نو ښه داده چې لومړی خو خپله ماتې پیسې ولرئ که تاسو سره نه وي موټر کې تر سپریدو مخکې ډریور ته ووایئ چې تاسو سره ماتې پیسې نشته مناسب ځای کې دې پیسې ماتې کړي، داسې هم امکان لري چې د ورخطایئ په وجه لا تاسو ځینې پیسې وغورځیږي نو تر خطر اخیستو ښه ده اماده اوسئ
- د نشي توک استعمال مکوئ (چرس ، نسوار ، سیګرټ)
تاسو په موټر کې یواځې نه کینۍ داسې کسان تاسو سره ناست وي چې یو یې هم نه پیژنۍ نو فکر مو وي د نشي توکو استعمال ونکړئ ځکه که څوک د دغو توکو په لیدلو او استعمال سره اذیت کیږي یا ورته کومه ستونزه جوړیږي، کولای شئ د دمې لپاره ودریدو وخت کې تاسو دغه توکي استمعال کړئ او موټر ته تر پورته کیدو مخکې باید ټولې هغه نښې نښانې ختمې کړئ چې خلکو ته د اذیت سبب کیږي د نشي توکو استعمالونکي یې په نښو ختمیدو ښه پوهیږي
- لاړی توف کول / نسوار شیندل
له شیشي سر ویستل نسوار توف کول یا لاړې توف کول هغه څه دي چې ناستې سپرلیو ته زړه بدوالی راولاړولی شي نو کوشش وکړئ داسې څه له ځان سره ولرئ چې د دغو مشکلاتو د حل لپاره ترې ګټه واخلئ داسې کاغذ یا دستمال چې پرې مشکل حل کړئ ځان سره ولرئ
- وسایل نه خرابول ( د سپرلیو / موټر/ موټروان)
د سپرلیو غوټو سره باید احتیاط وکړئ نه چې کوم قیمتي یا خرابیدونکي شیان پکې خراب کړئ، د موټر په وسایلو لکه ټیپ سي ډي فلش او چارجر … کې ګوتې مه وهئ د استعمال په وخت کې یې له ډریور مرسته وغواړئ
- خدای په اماني
له موټر د ښکته کیدو په وخت کې ټولو سپرلیو ته د ښه سفر دعا وکړئ او د سفر شریک وخت تیرولو مننه ترې وکړئ، کوم توکي یا سودا چې درسره وه د موټر له روانیدو یې مخکې وګورئ تر څو بیا پسې سرګردانه نشئ
