د تیزو توپ اچونکو لټه

افغان لوبډله د تیزو توپ اچونکو له کمښت سره مخ ده پدې لړ کې ځینې پروګرامونه برابر شول چې پکې ورک استعدادونه راوباسي او د تیزو توپ اچونکو تشه ډکه کړي خو لا هم افغان کرکټ بورډ پدې برخه کې نه دی توانیدلای چې خطرناک تیز توپ اچونکي دې ولري

که له یوې خوا د افغانستان موسمي حالات او د لوبغالو جوړښت د تیزو توپ اچونکو لپاره ندی برابر له بلې خوا دغې برخه کې راغلي او لوبیدلي لوبغاړي ګیله لري چې دوئ ته توجه نه کیږي او ډیر کله د ښه ښه تیزو توپ اچونکو استعدادونه خاورو سره خاوري کړل شي
د تیزو توپ اچونکو په لټه کې پروګرام چې کرکټ بورډ په لار اچولی و د داسې ماشینونو په واسطه ترسره شوي چې د ملي لوبډلې د تیزو توپ اچونکي د توپ اچونې سرعت (سپیډ) یې تر ۱۲۰ پورې ښوده نو پداسې ماشینونو د نوی استعدادونو پیدا کول ناممکن دي
په دغه لړۍ کې د افغانستان کرکټ بورډ له لوري په ۵ زونونو کې د تیزو توپ اچونکو لټون وشو او پکې د ګوتو په شمار لوبغاړي انتخاب شول چې کرکټ بورډ به پرې کار کوي او د مخکې تګ لپاره به یې برابرو خو ډیره موده دغه پروګرام بې له کوم دلیل ځنډیدلی و او دا دی اوس بیا پیل شو هیله به ولرو چې دا ځل ترې څو ستوري راوباسو
